धेरैजसो मानिसहरू लचकता र सन्तुलन सुधार गर्न योगाभ्यास गर्छन्। तर, यसले कोर (पेट, कम्मर र तल्लो ढाड) को शक्ति बढाउन पनि उत्तिकै प्रभावकारी भूमिका खेल्छ। क्रन्चेस वा सिट-अप्स जस्ता कसरतले एउटा निश्चित मांसपेशीलाई मात्र असर गर्छन् भने योगासनले समग्र शरीरको सन्तुलन र स्थिरता मजबुत बनाउँछन्।
योग प्रशिक्षक मेलिसा लिचका अनुसार सुरुवाती अभ्यासकर्ताका लागि यी ३ आसन निकै लाभदायक छन्:
बर्ड डग पोज (Parsva Balasana): चार हातखुट्टाको भरमा बसेर विपरीत हात र खुट्टा सीधा तन्काउने यो आसनले मेरुदण्डलाई स्थिर राख्न सिकाउँछ। यसले पेट र ढाडका मांसपेशीहरूलाई सन्तुलित र बलियो बनाउँछ।
चेयर पोज (Utkatasana): कुर्सीमा बसेजस्तै घुँडा खुम्च्याएर हात माथि उठाइने यो आसनले तल्लो शरीरसँगै कोरलाई सक्रिय राख्छ। यसले मेरुदण्डलाई सिधा राख्न र ढाड दुख्ने समस्या कम गर्न सहयोग गर्छ।
बोट पोज (Navasana): भुइँमा बसेर शरीरलाई ‘V’ आकारमा सन्तुलनमा राख्ने यो आसनले पेट, कम्मर र हिप्सका मांसपेशीहरूलाई एकसाथ सक्रिय बनाउँछ।
सुरुवातमा शरीरलाई धेरै दबाब नदिई सहज रूपमा अभ्यास गर्नुहोस्। नियमित रूपमा यी तीन आसन गर्नाले शरीरको सन्तुलन, पोस्चर र दैनिक कार्य क्षमतामा उल्लेखनीय सुधार आउँछ।
